اليوم : الثلاثاء
التاريخ : 23 - 10 - 2007
الساعه : 5 والنصف مساءً
حصرياً ( لشبكه السويد العامه )



أرسل الشاعر/ عايد الدواس السويدي الأبيات التالية إلى الشاعر/ عيد الخليوي السويدي بعد إنتهاء زيارته إلى الدوحة حيث قضى عيد الفطر بمخيم السويد في قطر ويوصي الشاعر بالسلام على أولاد صقر ويمتدحهم ويثني على مجالسهم كما شارك في هذه المساجلة الشاعر/ معزي الركيد الفداغي والشاعر/ مقبل المظهود الفداغي ووردت كالتالي :



1) عايد الدواس السويدي:
يا عيد سلم لي على الربع يا عيد
بجلساتهم قلبي سعيد وهناوي
لا شك دنيانا نوت بالتصاديد
كم عذبت قدامنا من شقاوي
قبل الضحى عندك شمالي مسيعيد
والعصرما بين الحفر والصداوي
لكن أمانة عمهم دون تحديد
عسى الولي يديمكم للعزاوي




2) عيد الخليوي السويدي:
سلام ياصل للجماعة ياخو عيد
أخو(ن) عزيز ما خطتك الهقاوي
شرفت ومسيارك طغى فرحة العيد
مثل المزن اللي كسا عود غاوي
للجود تجديد(ن) وللطيب توكيد
أصلك نبيل وبالصداقة نخاوي
وعذرا" على التقصير يا ابن الأجاويد
وعسى الفعول اليوم عند الرجاوي




3) معزي الركيد الفداغي:
يامرحبا مليون وألفين وتزيد
بالشاعر اللي باللوازم حظاوي
جاب السلام اللي موجه بتأكيد
من شخص في حبه صدوقن صفاوي
الصاحب اللي جيته كنه العيد
عز الرفيق وعز منهو يخاوي
عايد ولد دواس ياعيد صنديد
يعذر من التقصر ماهوب شاوي




4) مقبل المظهود الفداغي:
ياعيد بلغ مرسل الخط ياعيد
عسى الولي يكفيه شر البلاوي
قله بمسياره لنا خله يعيد
لاصار قاع الأرض بالديم راوي
في جيتك زال الكدر والتناكيد
وفي غيبتك مالي طبيبن مداوي
وأختم كلامي لاأنقص ولا أزيد
أنا على شوفك كثير الرجاوي




وانشاء الله حازت على رضاكم ,, وامنياتنا القلبيه بدوام المحبه والود بيننا وبين ابناء العمومه في مملكتنا الحبيبه والشقيقه ( المملكه العربيه السعوديه ) .
ونتشرف كاأولاد صقر بزياره أي شخص من افراد القبيله بالعمـــوم .....
" وهذا دليل على المحبه والموده رغم ابتعاد المسافات "
اخوكم ( ابو صفــــــــوق السويــــــــدي )
عايــــــــــــد آل جبهــــــــــــان